قصاقيص

صراع نفسي

مع نفسي

عشان متعبش يوم نفسي

بحبك بس كان نفسي

يكون الحب ده مقبول

صراع من تاني جوايا

بداية حب ونهاية

لنفس البطلة والفارس

حكاية بتحكي ورواية

بتتعاد كل يوم بالدور

وانا وانت...

بنبعد تاني ونقرب

ونهرب قد ما نهرب

ونرجع نلقي اشواقنا

كانت مع البُعد بتكبر

وترجع تاني قصتنا تسمعنا لما نقول..

"انا بحبك

انا عشقتك

انا معاك وملكك علي طول

انا هبعد

انا هنسي

وهصحي من الحلم

واقوم"

ونرجع تاني نتلاقي

في عصر من عصور بلقيس

اكون "جولييت"تكون "روميو"

اكون "ليلي" تكونلي"قيس"

وهيجي اليوم وهنحكي

قصتنا لاولادنا

وهيعرفوا ان قصص الحب

مرت في حياتنا

..قصاقيص..

ساعة الصلاة

ساعة الصلاة

دقات قلبي بتجري عليه

وتمد صوتها لربنا

تدعيلك ياللي بين إيديه

نتلاقي في لحظة سجود

عمو حامل

عمو حامل كل خير

عمو بيحب بضمير

عمو بيدعلنا الدعاوي

واحنا بنردد آمين

عمو بيه يشبه غفير

أو غفير اصله بيه

عمو اصلا يبقي مين؟؟

قالو في الزمن القديم

اللي مالوش دايما كبير بيشتريه

وعمو ده شخص في خيالي

ضميري بيتحامي فيه

احساسك دم

عن ناس بتّسبْ عشان بتحب

في الحب وكل اللي يحبوا

عن ناس خايفة تعيش مبسوطة

ف فكل الماضي والاحزان

غرقانة ودايما مربوطة

عن ناس حوليك وفي كل مكان

وكتير قُدّامك بيعدوا

بتشوفهم تضحك وتخاف

مش عارف إيه سبب خوفك

احساسك من الآخر كان

بيتخطي كل حدود شوفك

فتقرب والدمعة بتجري

علي خدك زي سباق الخيل

وصهيلها بيضرب أوتارك

فبتعزف نغمة في عز الليل

وتصحي الناس في عز الفجر

مع إن الشارع كان الضهر

فمشاعرك كانت ضلمة عليك

الناس قدامك مش حوليك

ودموعك لسة بتشبه سيل

احساسك دم كان بيسيل

من جرح الناس قبل جروحك

قربت خلاص اكتر منهم

هتسلم وتمد إيديك

علي ناس اصلاًَ ولا تعرفهم

حزن عنيهم شدّ عنيك

خطواتهم سكنت من الواقع

أحلامهم كانت مرئية

كلها كانت تحصيل حاصل

بتعافر في اللامنسية

فكان قُربك ليهم هو الحل

خافوا تبعد فيتوهوا من تاني

وفضَّلوا ميبقاش بينكم قُرب

والبُعد ده كان أقوي اناني

وفي ثنية داستك عربية

وكانوا هما خلاص عنك بعِدوا

في 6إبريل 2014 

صوت الادان

صوت الادان

دفي وحنان

وفي وحدتك علي طول بيندهلك تعالي

يلا حي علي الصلاة

هفضَّل حبيبك

الحكاية في جُملتين

إنِّي مش عايز أسيبك

و إنِّي رافض أبقي بأي 

إسم تاني غير "حبيبك"

و إزاي في بُعدِك يوم أعيش

كل الحياة مهمنيش

إنتِ الأسس في الللا أساس

و انتِ الأفيش في الللامفيش

و انتِ الحياة

وانتِ الأمل

نرجع صُحاب؟!!

مش مُحتمَل

هوايا مش قد المقام

لكن تمام

بقوي أوي بُحبك ويقدر ع الزمان

ويكتمَلْ

فمتسامحنيش

لكن بلاش تمشي وحبي متبعيش

اديني فرصة أحسسك بالآمان

وخُدي فرصة تغرقي جوا المكان

اللي بنبض قلبك بيدُقْ

ف بعيش

ومتزعليش

انا عمري ما هقدر في يوم من تاني أسيبك

انا كنت في يوم وبقيت وهفضل "حبيبك"

هفضل حبيبك..

في 5 إبريل 2014

.

وقلبك لو ضحكلي في يوم

تكون الدمعة سبّاقة

لكنه خاف

إن كنت في يوم منطقتهاش

إنتي اللي قلبي انا حبَّها 

وإن كنت ياما مقلتهاش

فأنتِ اللي انا بحتاجلها

ده سنيني من غيرك ..عِجاف

وبيكي بتحدي الحياة

القلب بيكي فتّح وشاف

كل اللي ممكن ..مُحتمل

لو جيت في يوم ضاع الأمل

ضُميني القي الآمان

جواكي النبض اكتمل

فحسسيني بالحنان

أرجع قوي..

أقوي مما كنت عليه

أرجع قوي..

حلم بيمَدّلك إيديه

ويقولك إنه منتهاش

لكنه خاف...

لكنه خاف..

في 2 إبريل 2014