السبت، 26 يوليو 2014
صاحبتي
انا عايزة اقرب منك ساعة
تحكيلي ونغرق في التفاصيل
تشكيلي فنضحك واشكيلك
منك واغضبلك فمتبكيش
انا عايزة اكونلك شماعة
للحزن بتكسر طعم الخوف
انا ببعد فجأة مبعرفنيش
ولا اقدر اقولك "اصله ظروف"
معلش "انا آسفة" علي التقصير
احلامي بتقلب بالكوابيس
وواقع بيتحقق من الاحلام
انا عايزاكي تقوي وتتماسكي
لغاية ما ارجع لطبيعتي وانام
الجمعة، 11 يوليو 2014
حسبتك ملاك
عن حروفك اللي ساكنة
وسط تقاطيع الكلام
عن حبيبتك اللي خايفة
متحسش معاك آمان
هي ليه دايماً بعيدة!
وانت مش عايز تقرب
بالطريقة اللّي شايفة
حبك ليها هيبقي اطهر
غلطتها الحقيقة كانت
لما قربت زيادة
لما سمحتلك تقول
"حبك ليها خلاص عبادة"
رغم إن جوابها كان مُكتفي بلحظة سكوت
جيت وفكرت السكوت منها ده علامة الرضا
وسكوتها عمره ما كان قبول
والايام عدت ولكن
الطريق غير الطريق
تحاول تنساها فتقسي
وترجع تلقالها وجود
وهي ليه محاولتش تنسي
وقالت"يصح ولا يجوز"
تتحرق ببرد الشتا
ترجع تلاقها ربيع
لسة صادقة علي الوفا
حتي لو كنت بعيد
تيجي انت وليها ترجع بالجروح
ولإن الجرح كان اقوي من الكلام
عن وجعها مقدرتش تبوح
لسة برده شايفها جارحة
وشايفها السبب الاساسي
إنك ليها تبقي جارح
وإنك ليها كمان تخون
وإن جات وسامحتك في يوم
فقانون المسامحة مش شامل كلمة "رجوع"
هي حبيبتك القديمة
وهي جعبة الهموم
وإنت ياما حاولت تبعد
ترجع تلاقيها بتستناك
إنت شفتها "قديسة"
هي حسبتك"ملاك"
12/4/2014
بيحبها
هي بعدت
هو بعد برده فجأة
هي حست إنه عادي
هو محسش ليه بمفاجأة
لما هي جتّ تقرب
هو غرّب عن شروقها
ليه هتزعل؟!
هي حبّت أه وبجد
ومش هتقارنه بأي حد
بس يارب اللي جاية
تبقي أحسن منّها
هي عارفة إن بُعده
ده لإنه ..حبّها
ففجأة بعدت
وفجأة قرّب
وخاف ..فخافت وقتّها
شروق غروب..واسأل مجرب
عن بُعد حاجة يحبها
فيفضل علي طول علي ود بيها
ويفضل علي طول بيحن ليها
ويفضل علي طول بيبعد بعيد
ولإن بُعده هزها
هي علي طول مُشتاقة ليه
هو علي طول بيحبها
حلمي فيكي
حلمي فيكي ضاع عشانك
ويسألوني اية الدليل
كل واحد بيداريكي
وطمعه فيكي عمّال يزيد
واللي حبك؟؟!..مات شهيد
حلمي فيكي اتعلم
ميبقاش حلم
حلمي فيكي اتكلم
فخرج برا اطار الفيلم
فاللي ماتلك كان بيحلم
مدّ ايده عشان يساعدك
الواقع قطع ايديه
صرخ بصوته
فاتخرس
شاف الحقيقة ..فطلقة من غدر البنادق
كانت جزاة وقنصت عنيه
كل اللي يشوف حقيقتك ميت
والجاهل هو اللي يعيش
حلمي فيكي عاش شهيد
بعد موت مليون شهيد
اختي
كل سنة وانتي أسمي
كل سنة وانتي أحلي
كل سنة وانتي أغلي
ما كان و ما يكون
كل سنة وانتي أختي
كل سنة وانتي جمبي
كل سنة وانتي عندي
اهم قلب في الوجود
كل سنة وانتي ذكري
كل سنة وانتي فكرة
كل سنة وانتي حية
فوق حياتك فيا أنا
كل سنة وانتي أملي في الحياة
وانتي ليا طوق نجاة
كل سنة وانتي بالنسبالي الهنا
كل سنة وانتي عبرة
في العيون بطعم الفرح
كل سنة وانتي اجمل شئ
في حياتي انطرح
كل سنة وانتي نقيضي الجميل
وانتي ملاكي الصغير
كل سنة وانتي أنا
في 29 مايو 2014
بمناسبة عيد ميلاد اختي الحبيبة
في نص الليل
في نص الليل ..مشاعري سكون
وضلمة ونور
وشوق مدفون
طريق واسع مدي بصري اللي كان مكفوف
مافيش قدرة اعدي حدود مشاعر الخوف
لكن كملت..واتحملت
مانيش خايف من الضلمة
لكن مالنور
في نور كشاف
وضلمة إزاز
بيعمي عيوني عن المكشوف
انا الغلطان
وانا السهران
وانا اللي اخترت ابقي بشوش
طريقي في ليل
وقلبي دليل
لكن الخوف منعله الشوف
واحد من فين
واحد مسكين
واحد شاف اللي مش بيشوف
فغمّي ضميره بنور كشاف
سرق من أخوه
كسر في إشارة عدي وداس
صبح مجنون
ولا كانله قلب
ولا في ضيّ
يقلل ضلمة جات في النور
بتأذي عيون مين بيشوف
صرخت وقلت :انا مسروق
وجيه الفجر
فظهر النور
رجعت قوام.وانا المسؤل
القصيدة فكرة صديقتي علية محسب
الاشتراك في:
الرسائل (Atom)