falling

رسمتي

ودي الصورة الاصلية

رسمتي مع بعض التأثيرات

أزمة مع شيطان

في وسط الأزمة مش محتاج

أنادي لشيء يداويني

في وسط الأزمة انا محتاج

أناجي بقلبي رب رحيم

سامحني يارب .كنت شيطان

في وسط ملايكة حوليّا

طبيعي جداً أكون خسران

وانا اللي جنيته بإيديا

بقلبي بنادي وانت عليم

فبلجأ ليك تطهرني

ذنوبي بحر موجه شباب

في صوت في العُزلة كفّرني

ومن الوسواس فتحت الباب

غرقت وقمت فجأة بكيت

يونيو 2015

عدت سنة

عدت سنة..

والذكريات جوايا عايشة

وساعات بحس إن اللي ماتت

كانت انا..عدت سنة

...

عدت سنة.ويقولوا خير

البنيّةْ مكملة

ماشية وعلي نفس الطريق

كل الهموم.متحملة

ومعلّمة كل اللي فات

ببسمتها وسط الوجع

رمل الطريق مكفهاش

علشان يضربلها الودع

ماشية بترسم ذكريات

بعيون بريئة من الظنون

حاسة بخوف من نفسها

يزيد في خوفها من البشر

رغم خضوعها لقلبها

وقبولها منه بالجنون

قادرة تسامح كل لون

وتقول..لعله مكنش شر

وتساعد مين يحتاجلها

لو اتقْفلت وياك بيبان

ترتاح بقلبك عندها

عسكر وحرامية

نقطة ماية تساوي حياة

إلا في بلدي تساوي الموت

نقطة ماية..حلم وضايع

بس في بلدي الحلم..كابوس

نقطة ماية

جات فيعنيا

بسمةأمل اطرّحت فيا

جيت أرويها..و أخليها

شجرة في جنة من الحرية

ضوء الضلمة مكنش رحيم

جرح أوراقها

قبل ماتطرح لينا الورد

وقبل مانجني الأحلام

كل العزم في ثانية انهد

كل ورود الحب في بلدي

مقطوفة ومش مجنية

كل رموز القوة الصادقة

بتلعب بينا"استغامية"

و إحنا ندوَّر مش لقينّها

الخلاويص راح تخلص منّا

الكداب صادق قُدامنا

فالصادق أصلاً كداب

ولمّا لقينا الصادق فعلاً

من كتر الخوف كدبناه

كل البلد غاوية اللعب

وشادة شريط اللون الأسود

علي عنيها

ومغمية

كل البلد لمّا زهقت

لعبت عسكر وحرامية

26 فبراير 2015

مالوش لزوم

لو في يوم قدرت اسيبك

يبقي إحساسي اللي قالي

إن وجودي زي عدمه

وإن قربي مالوش لزوم

بس_حبي_راح يدوم

غصب عني وعن إرادتي

كل دعوة هدعيهالك ..كل يوم

وكل دعوة بحرف اسمك راح تكون

"بيك هسامح اللي باقي من حياتي"

"هبقي باقية علي اللي فات"

"اوعي يوم تنسي اللي فات"

"همزة علي سطر _حبك_ليها طعم وذكريات"

اللهم اهدِ قلبهُ اللي لسه انا ساكنة فيه

وكل دمعة من عيونه 

تبقي بس في السجود

ابعد عن قلبه الهموم

وتبقي فرحته بزيادة

يبقي قربه ليك يا _ربي_

هو أحلي وأنقي عادة

عن جدارة واقتناع

ميقربش للضياع

الملاك في قلبه ساكن

وبرده جواه الشيطان

زي غيره

وزي_احنا_جوا منا

ملاك

شيطان

لكن واحد فيهم_أقوي_من النقيض

بس "هو"مش أكيد

عنده جزء من  التساوي

لكل معايير الوجود

عنده طيبة جوا قسوة

ورزانة في الجنون

__مش مهم__

الاهم.في اللي اقوي من التناقض

والصراع جواه يناقض

يعني يوم يكسب شيطانه

تاني يوم يغلب ملاكه علي الشيطان

يبقي نادم علي اللي فات

يملي دمعه العيون

يبقي خايف من اللي جاي

يحدف الايام بطوب

يتكسر بيته الإزاز

ثانية ثانية..انسي انا كل اللي حاصل 

ونرجع اقوي من اللي فات

ثانية تالتة..ارجع احس ان وجودي

مالوش لزوم

9فبراير2014

وقلبك

وقلبك لو ضحكلي في يوم

تكون الدمعة سبّاقة

وقلبي لو ماليني هموم

بحُبك ينسي كالعادة

وعشان حاجة

تضيع حاجة

مبحتجهااش غير في البُعد

برغم إنك محتاجة

تكوني بعيد

رجعنا لبعض

و لية أصلاً لُقانا ده عيد

تملّي مُقيْد بالمواعيد

ومش محتاج أعيد و أزيد

وأقولك تاني :"إية الحل"

بجد لماذا وعشان إيه.؟

لعل البُعد أصلا خير

لعل الحب أصلاً عيب

لعل العيب مالوش في الحب

لعلنا قصة متعادة

ف بزيادة

يا دنيا اصلا زيف

والفرق اصلاً اية

بينكم وبين داعش

يا دنيا أصلاً زيف

كل االلي قاعد ضيف..

ع الأرض..راح يمشي

كل اللي صاحي ليه

م.الصدمة مانامشي

ونجيله في الدفنة

نقوله "صباح الخير"

صبح الصباح يا شعوب

يا تعيش ساكت مستور

يا تنام ما بين أنجاس

ربك غضب ع.الناس

سلّط عليهم "دم"

ولا فهموا ولا تابوا

زاد الكرب والهم

ولا فهموا ولا عادوا

لبيبانه يتناجوا

ولا نجحوا يلقوا "سلام"

ولما القلوب بيضة

تعبت من الخيبة

ربك أمر مأمور

يرتاحو م.الدنيا

وفي لحظة وفي ثانية

كل العيون هتنام

في 17 مايو 2015

شعب عجب

شعب قادر

شعب تتغير صفاته

شعب معني الحياة

يتلخص من بين آهاته

شعب مستني الفرح

رغم دمع علي خده سايل

شعب ساذج

شعب كل ما يقول "آه" منّهاا.بيسب فيها

ولمّا غيره فيها يشتم

يلعنه ويسب فيه

مين معاه اللي في إيديه

لما يحكمه عبيد؟!

مين مسامح في اللي فات؟!

مين مخطط للي جاي؟

ثورة ثورة..ولا نخاف

وخوفنا كان أساسه ضيّ

شعب بيحب يخبي

و علي الجراح يدوس يعدي

عادي جداً فيلم تافه

كل فشار

قزقز لب

شعب يحس بالآمان في سجدتين

ويطلع من الجامع يسب

إلا من رحم ربي

شعب أصله من العجب

2014

بالناقص حبيبتي

ومش لازم أكون عايش عشان أقولك:"بحبك موت"

ومش لازم بجد "أموت"

ومش لازم أفكر "ليه"

"وعشان إيه.بعدتي بعيد"

ومش لازم يكون العيد

و انا وياكي في بيت واحد

حبيبتي بجد الواحد

ماهوش ناقص

وبالناقص

هعيش بسلام وحيد الروح

خلاص عنك...

بلاش تضميد لأي جروح

خلاص عنك ..قفلت الباب

كفاية عتاب...وتعذيب نفس

ماحدش صخرةمش بيحس

و كل طاقة ليها حدود

وبصراحة...راح ارجع أحب

 و أرجع أعيد

معاكي القلب لسة سعيد

حالف ل.يعود

ويختارك من الأول

ويرجع برضو فيكي...!. يموت

الحب رزق

إنك رُزقت حُبها

فالحب رزق

وإنك قادر تضحكلها

فالبسمة رزق

وإنك خايف تبعد بعيد

فالقرب رزق

 وإنّك معاها تكون سعيد

فده برضو رزق

و إنك قدرت تقولها

مش شرط إنك شفتها

وقابلت أبوها وقلتله

إن إنت قلبك حبها

فبقيت معاها في نفس بيت

حصلت مشاكل من لا شيء

وشاء القدر يبقالكو طفل

من بعد "رُحت" رجعت "جيت"

 و فضلت أقوي بُحبها

ف ده خيرُ رزق

27 يونيو 2015

خسوف

يبدو اني مش بحرّم 

رغم كل الذكريات

فيا حاجة عاشقة حاجة

 جوا منك من سكات

فيك حقيقة شيء غريب

جوا مني معرفوش

بيك بشوف الكون جميل

رغم اني مش بشوف

شايفة صورتك جوا قلبي

سامعة إسمك بالساعات

عني لو حزنك تخبي 

هبقي حاجة من الحاجات

اللي لو تعيش تموت

خبي سرك جوا مني

تلقي سرك في آمان

 جوا نعش من النعوش

قولي مرة حلمت إني

القي منك الحنان

قولي:"ياما حكتله عنك"

_هو مين؟!

"قلبي"

_من امتي؟!

"زمان"

تلقي قلبي بيك يطير

والشتا اتحول ربيع 

او ربيع شبه الشتا

كل نار الصمت فيا

تبقي فرحة متكتكة

قولي ولو هفرح ثواني

بس متقلهاش مجاملة

رغم إني في الحقيقة

مش هغير المعاملة

حتي لو قمري الحزين

جيه حصله في يوم خسوف

حتي لو وشي بشوش

لسة برضو مش بشوف

شيزوفرينيا

1

شيزوفرينيا مشاعر

هتفهم منين

إذا القلب شاعر

بحب وحنين

إذا القلب خايف

او القلب عايش

او القلب جايز

يكون مش حزين

2

شيزوفرينيا عقول

و إية الجديد

تجيب ولا أقول؟

ولا قلبك حديد..

ولا الكل شايف

بإن انت عايز

تكون عقل فايز

بعلم السنين

3

شيزوفرينيا سذاجة

تضيق بالنفوس

تبيع الطيْابة

لأجل الفلوس

تبيع الحبايب

عليهم تدوس

وترجع تعوز

يشيلوك في العينين

شيزوفرينيا مشاعر

هتفهم منين

قلبه فاضي

لسة جوه قلبه فاضي

خاف يراضي ..فيخسرهُ

خاف يداري .فيكسره

خاف يصارح

أو يصالح..قلبه اللّي عاش زمان

خاف يقرْب من المكان

خاف يحس بالأمان

فينسي إنه يكون حويط

أصله لمّا كان صريح

وكان علي حبه حريص

فجأة جه اللي يدمره

ف لسة جوه قلبه فاضي

و لسة عمره بيخسره

البنت

البنت تحب تكون ضهرك

اللي اساساً ساندة عليه

البينت تسيبك وهي اكتر حد نفسه يفضّل جمبك

وبتدعي يارب "اكتبله الخير"

البنت دي عيْلةَ بتحبك

وأُمك لو جيت في يوم وعييت

قلبها ده ملكك وإن كانت

ولا يوم في العمره عاشته معاك

تبعد عنك وهي عايزاك

البنت اللي في وقت الضيقة 

بتحضن ايدك من غير لمس

البنت دي أصلاً محتاجة تحتاجلك

فتلاقيها جمبك

وساعتها م تحتاج أيُها شيء

البنت تحب الحب يكون 

أطهر من إنه يكون كائن

وتتعذب في الحب المبني علي الاخلاق

ده لإنه شعور دايما دائم

ومالوش شروط ولا له اسباب

كلمة "الحب" دي بتقولها

في كل صلاة لكن بالهمس

البنت دي اكتر شيء جامد قُدام الناس

لكن بيحس

عن

عن احاسيسي الظريفة

واللطيفة والطريفة

والخفيفة ع السامعين

عن حبايب بتناديهم

وتلاغيهم

ووتشاغلهم

وتحاملهم

ومرة لو حبيت تقرب

يسألوك فجأة "انت مين"

عن حاجات ملهاش علاقة

وكلام من غير لباقة

وعن مشاعرك لما شفت

صورتك الحلوة في بطاقة

فمن ملامحك فجأة خفت

ورحت قايل "صورتي فين؟!"

عن كلام عمرك ما قولته

وعن حاجات ماتتحكيش

وذكري مهما حاولت تنسي فيها..مبتتنسيش

عن سعادتك في الدقايق

رغم وجعك في السنين

انت حد مهما يلقي

صعب في يوم يتقال حزين

بائعة الورد

بائعة الورد

كلمات Bahaa C Alex

الاداء الصوتي للشاب Bahaa C Alex

his page www.facebook.com/angel.c.alex

....................

والاداء الصوتي للبنت ..ادائي البسيط :)

.............

الكلمات

:

:

_ فى اشارة ساعة مزدحمة 

اعانى منها يوميا

السيارات تكون ملتحمة

والازعاج يكون قويا

اتانى اكثر من بائع

وكثيرا اطفال الشارع 

الزحام يكاد يقتلنى

والصوت من حولى غارة

اطفئت محرك السيارة

كى اهدا واشعل سجارة

اغلقت نافذتى ثم عينى 

بدا طرق بسيط يقصدنى

اهو طفل اخر

يا هذا اغرب عن وجهى

وفتحت عينى فراتها

وبدا صوت يهمسنى

*اسمى زهرة

ولدى يعمل فى البستان

لم ارى امى بالمره

افقتد الدفى والحنان

انام فى فناء منزل

احلم بفراش وامان

ابيع الورد كى اكسب

اصبحت كبيرة الان

احيانا يراودنى حلم

بعروسة وحذاء وفستان

_ نعم......تذكرتك يا بائعة الورد

تذكرت ضحكتك حين اعود

تذكرت صوتك يشبه انغام عود

تذكرت يدك الصغيرة تمسك ورود 

تذكرت شكلك الملائكى الجميل لم ارى مثله ف الوجود

* وانا اذكر ايضا 

ليلة العيد

حين ذهبت معك واشتريت لى فستان جديد 

اذكر وعدك لى بان تاخذنى معك ونذهب بعيد

كم كنت احب زحام هذا المكان

ولكن مر على هذا زماان

_لا لم يفت بعد الاوان

سوف تكونى طفلتى 

ستذهبين للمدرسة يا صغيرتى 

غدا سينتهى هذا الحال

* هل حقا ساكون مثل باقى الاطفال..؟

_ نعم ستكونى اجمل الاطفال

لماذا لا تجيبينى

هل تسمعينى

..

سوف تاتين معى غدا وانا عائد

وحين عدت وجدتهم يغطون وجهك بالجرائد

بالله عليكم ماذا حدث

شاب متهور يخترق اشارة

يقتل طفلة صغيرة فى حادث اصتدام سيارة

وسكتت من حولى الضوضاء

وكانى اصبحت فى صحراء

كان دب فى جسدى السم 

وانا ارى فستانك الجديد يملئه الدم

اجئت لاصتحبك معى ام جئت لاودعت اليوم

الورود تبكى من حولك على فراقك

ومعها تذكرات اخير كلماتك

*اريد ان اكمل تعليمى

اريدك ان تعلمنى اصلى

اريد ان افهم دينى

اريد ان المس نجمة

فى ليالى حين تاتينى

اريد ان ازرع ورده

تكبر وهى تحمينى

الرابط علي الساوند

https://soundcloud.com/kareenaa-kapoor/vljiuaftebbu

مش سامع

الرابط علي الساوند https://soundcloud.com/kareenaa-kapoor/ak-1

•  117 plays117
• More stats

Kareenaa Kapoor

•  82 followers82
•  9 tracks9

البداية من زمان كانت بفكرة
حاولنا نطور من الفكرة وننفذها على ارض الواقع
الصعب دايما بيكون فى التنفيذ بس شكل الفكرة فى النهاية دايما يخليك تتخطى عقبة البداية
رجعنا مرة تانية للواقع
‫#‏مش_سامع‬

اخراج وموسيقي وتلحين:angel
www.facebook.com/angel.c.alex

كلمات واداء مشترك:angel & kary
AK
#مش_سامع

........................
اتعلمنا زمان ان جمب الحيط هو الامان
والظلم لية وقت والعدل بعديه لازم يبان
كله كدب وكلها شعارات كدابة
ويقولك العدل فى تطبيق قانون الغابة
زى عصفور ضل الطريق وتاه وسط سحابة
ويقع على الارض وسط شوية ديابة
قول العصفور كان غلطان وبدل الحقيقة
والكدب ينتشر معا مرور كل دقيقة
عيش عزيز او زليل عيش قوى او ضعيف
بس خليك فاكر ان انتا مجرد ضيف
كل واحد مننا لازم يرد الدين
هيجى اليوم ونتسال وديتو الحق فين
مينفعش اقول لكلامهم كنت سامعة
مش سامعة
معتقدش كدبكم ممكن يوقف دمعة
مش سامعة
غير صوت صحابى ماتو فى الجامعة
..
كل حاجه ماشية عكس وصعبة جدا الحياة
كل مره الاقى سد ومعاهم قلبى تاه
حتى الحل يكون فى فكرة برضة تقتلة الظروف
زى طفل فى اوضة ضلمة وسلم نفسة خلاص للخوف
ممكن ضعف منى انى مش قادر اشوف
اشوف مين عدوئ اشوف مين معايا
اشوف كم مرة فشلت وابدا من البداية
كل يوم بيفوت عليا يقولى خلاص بتكبر
اكتئبت اكتر واكتر ودخلت فى عزلة افكر
اكتشفت.ان العيب مش فيا اد مافيهم اكتر
كلامكم كان كتير بس اصله كان تزيف
تزوير للحقيقة جبتم للعقول نزيف
عايزين جيل مشوه ميعرفش الحقيقة
عايزن جيل يصدق ان لعبتهم بريئة
بس انا اخترت انى اكون مش سامع
مش سااامع
غير صوت منبر سكت فى الجامع
..
كلام بيخدع ليه سحر على الودان
كلام يتقال هو هو من زمان
والضحية كام مليون واحد غلبان
سمعت كلامكم مرة والنتيجة انى ضليت
.لعنت عالمكم الف مرة يوم ماجيت
كل مرض الدنيا مش موجود الا فيكم
عايش فى مسرحية متنفعش الا بيكم
صعب جداً يوم أصدق
حد فيكم عنده مبدأ
يوم وتاني وراح يموت
تحت التراب ابقى اكدب
واللي فوق عايش في تابوت
حتى .. لو صادفتم الحقيقة
مش سامع احسن
فمشاعرى رافضة تسمع

حديث نفسي

S : عارف

و قت ما التأشيرة تيجي

وقت ما التكشيرة تروح

وقت ما العبّارة تغرق

هتقول ..

يا روح ما بعدك روح

_____________

K : وقت لما شموع حياتك

ضوئها فجأة ينطفي

وقت لما تحس صورتك

في الحقيقة بتختفي

وقت لما تقول هموت

_______________

S : وقت لما جيبت آخرك من آحلامك ..

و قت لما قومت بدري من منامك .. و أتخنقت !!

فعلاً الحقيقة مش بالوقت

__________________

K : قلت للحقيقة غيبي

راح اصدق الطموح

وقبل ما النتيجة تظهر

خفت جامد من السقوط

يعني خوفك كان لصالحك؟

ولا غيّر من زمانك؟

يعني من امتي مصالحك

كانت متلائمة لمكانك

هي عيشة وراح تعيشها

حتي لو مجنون تكون

______________

S : الجنون فوق مصالحي 

و العيشة قاتلة فرحي 

الحقيقة انى راضي

المصالح مسيرها تقضي

مهما كان في يوم مرادي

الحياة فعلاً هتمضي

لو مصدق نفسك إجري

الخوف بقي من زمانك

_______________

K : واثق ان ده كلامك؟

مش هتزود في الإضافة

ولا تقولي "هي ناقصة"

ولا تقولي"بلاش لطافة"

لما اقولك :الدنيا حلوة

زي صوت فيروز في غنوة

تلمس قلبك من جديد

يصحي قلبك من ثباته

يرجع الحلم لحياته

يرجع الإصرار حديد!

_____________

S : الحديد ده فوق كتافي

و الغنوة بقيت مماتى

لما الصوت أحترف السُكات

عرفت دي نهاية حياتي

و اليوتويبيا بالسكان

هربوا فجأة من منامي

إنتّ راضي تكون قصادي ؟!

ولا الهروب بقي أعتيادي

عايز تسمع غنوة تانية

ولا برضو هتبقي قاضي

إصراري إيمان بالموت

بعد صراخي بعلو الصوت ..

__________________

K : شفت! جبت قوام ورا

قلتلك عدّل كلامك

ضفت ياما ..صحيح كريم

والتناقض مش سليم

مش هطّول في ملامك

يعني من امتي كلامي

كان بيعمل مُعجزة

مع حد كتير يشوف

بعيون معجزة

مصلي فجره في معاده

وباقي الصلوات قضي

_______________

S : بص ! ..

الحقيقة مش بريئة

و الحكاية مُتعبة

انت مش حابب كلامي

زي مانا شايف هنا

ده اختياري من البداية

لو مش حابب تقتنع

أعتبرة مشهد نهاية

أعتبرني برة طوقك

و بكده تخلص خوفك

لو كلامى تانى رجع

مش مهم .. !

الكلام قلب جد

مش هعيش مكسور لحد

__________________

K : "مش هتعيش مكسور لحد"!

صقفة جامدة علي الكلام

حلو جداً التناقض

لمّا يبقي للسلام

كل حاجة جوا روحك

فرحتك

حزنك

جروحك

راح تكونلك قصيدة

دمعك عمره مايبقي عيبة

غير لو طوّل زيادة

صفحتك اقلبها يلا

ذكريات حلوة ومرة

وراح نكمل من البداية

كعبلة وقت

الوقت بيهون البعاد

ويعلمنا إن اللي باقي لينا

هما حبة ذكريات

لكن إنتْ بُعدك مش كدة

عدت عليا السنين

ولسة كل يوم بيمر

بصحي علي حرف اشتياق

ده الحب لحظة من العناد

بتصاحب لحظة من الجنون

لو قرب كان او كان بعاد

شعاره أكون أو لا أكون

الحب أقوي من الفراق

وبيت قصيدة بدون حروف

وشعبه تايه في البلاد

ماسك قلوبه من الوجع

الحب مش صاحب جدع

لكنه مش ندل كمان

الحب لو عوزته تلاقيه

يقفل قصادك البيبان

والحب لو سبته يلاغيبك

يفتح قصادك الف باب

الحب فرحة ومحزنة

فبلاش تعوز من الحب شيء

غير إنه يبقي ليك آمان

تلقي العيون متبسمة

تلقي القلوب متكلمة

وتلقي الحبايب متجمعين

علي دعوة حلوة في الختام

حتي ولو مكنوش سوا

الحب بيت فاق الحدود

من غير سطور ولا مصرعين

فبلاش تعوز من الحب شيء

غير إنه يبقي ليك آمان

‫#‏كاري

Rehab Ali

فبلاش تفارق اما ممكن ما تفارقش .

وبلاش تبطل تفتكر لما تفارق 

وبلاش تضيع ذكريات 

كانت سعات هى الحياة 

وبلاش تقول بعد الفراق:

افترقنا . وقول

بعدت مسافة جمعتنا

Kareenaa Kapoor

حاضر هقول

رغم الظروف..مبقتش من الآخر في صالحي

لكن خلاص..آن الآوان

ارجع أفكر إية مصالحي

يمكن بُعادنا مكنش شر

انا اصلا ليه ابقي حزين

انا برده في الآخر "بشر"

وفي الحقيقة "لعله خير" 

Rehab Ali

Rehab Ali

دلوقتى 

فكرت فى نفسك 

وكنت بتشبهنى بنفسك 

وكنت بتخاف لما اقول 

كلمة فراق 

وتخاصمنى نص ساعة 

وبعدها ترحع تقول 

انا قلبى راق .

Kareenaa Kapoor

تفكيري في نفسي ده لإنك...

شيء مُتعمق جداً فيها

وكلامي كان أصلا عنك

وعن كل حاجة بتحكيها

أحلامي بتتجسد ليكي

أيامي دي اصلا متعاشة

علشان أسمعلك غناويكي

وعلشان احميكي من الباشا

بدعيلك في كل صلاة أو صوم

لا البعد يحسسك بالحزن

ولا تلمس قلبك أي هموم

ده البُعد ده شيء هيجمعنا

لو مش في الدنيا

فَ في الجنة 

Rehab Ali

كلامك كان ليه زمان 

كله امان واطمئنان 

كلمة "حب" كانت غنوة 

بتغنيها فى بحر عيونى 

ليه دلوقتى بتحرم بحر

من غناويه 

سايب الشوق تايه فيه

Kareenaa Kapoor

حد بيقدر يحرم بحر؟!

غير لو بحره اصلا صدّق

بإنه مكتوبله الحرمان

و انتي البحر اللي بعيش فيه

لمّا بكون فيه غرقان

Rehab Ali

مش فاهم برده التفسير 

ايه اللى يخلى حب كبير 

يبقى فى لحظة ذكريات

يبقى صورة نفتكرها 

وندرايها وسط الحجات 

ليه حبك يبقى مؤلم 

ليه فراقك سببه مبهم 

هاسالك اخر سؤال 

لو لسه مستنى هترجع 

بحرك مشتاق لغريق

Kareenaa Kapoor

تكوني في بحري غريق؟!!

ده شيء حقيقي انا مقبلوش

وعلشان كده..

انا لازم ابعد عن حياتك

انا لازم ابعد عن الطريق

اما السبب..

مالهوش وجود

او بالآصح مش راح اقوله

ربي يبعتلك آمان

في قلب طيب وحنون

قادر يفتح البيبان‬