وفي الجمعة

وفي الجمعة

ويعشق مطرة سماعة

لدقات طبلة الفرحة

واقوم مشتاق

هقابل ناس

واعدي طريق

وهسجد سجدة بطعم العيد

واقوم ناسي إن انا فاكر

بإن الشيخ ماهووش خاطب

وان الدنيا اصلا صيف

وان الشمس دي عروسة

شعاعها معدّي الطرحة

ف أكون زعلان

واقوم فاكر ان انا ناسي

بإني ماعدتش زي زمان

ونسيت اقرا سورة الكهف قبل مانام

انا قلقان

ماهو لو بس كنت اعرف

بإني هنام من بعد الماتش

مكنتش اصلا اتفرجت

صحيح..!

الماتش كان كام كام؟!

#كاري

19-9-2014

لكنه خاف

إن كنت في يوم منطقتهاش

إنتي اللي قلبي انا حبَّها 

وإن كنت ياما مقلتهاش

فأنتِ اللي انا بحتاجلها

ده سنيني من غيرك ..عِجاف

وبيكي بتحدي الحياة

القلب بيكي فتّح وشاف

كل اللي ممكن ..مُحتمل

لو جيت في يوم ضاع الأمل

ضُميني القي الآمان

جواكي النبض اكتمل

فحسسيني بالحنان

أرجع قوي..

أقوي مما كنت عليه

أرجع قوي..

حلم بيمَدّلك إيديه

ويقولك إنه منتهاش

لكنه خاف...

لكنه خاف..

في 2 إبريل 2014

تصبح علي خير

_إتغطي كويس قبل النوم

فكَّر في كل شيء كان عجبك

ومتفتحش أبداً باب حلمك

لأي هموم

*هاخد بالنصيحة بتاعتك

بس ساعدني وقولي يا جدي

إية اللي ممكن افكر فيه؟!

_اختار انت..كل هموم الدنيا يا ابنيليها تضاد

يعني لما تيجي في بالك أي هموم

حط قصادها حرف الضاد وهات العكس

وفكر فيه..هتبقي ريلكس

*ههههههه ماشي يا جدي

أنا ساعات يعني بيجي في بالي 

.....سيرة "الكُره"مثلاً يعن

_بس خلاص هتكمل ليه

حط الضاد

يبقي الكره يساوي الحب

لو حليت الكون بعنيك

يبقي الحب هو الحل

سيب الكره وفكر فيه

*بس يا جدي الحب في زمني اساس الكره

_لا استني متلبخش..ليه الاحباط؟!

كل اللي في زمنك يا حبيبي

بيخدع غيره بإسم الحب

او مخدوع

كل اللي في زمنك يا حبيبي

باع طريق الجنة بنار

ويجي يقول انه الموجوع

زي ما برده..كل اللي في زمنك دلوقتي

عادي يحلف بسم الله..علي شيء كدب

ويتحايل بإسم الدين

علي الغلابة والمساكين

يبقي العيب في الدين يا حبيبي؟!

*طبعاً "لأ"

_يبقي الحب اكيد مظلوم

*صح يا جدي عندك حق

_نرجع لموضوعنا قوام

سبنا الكره 

وخدنا الحب

فكَّر فيه

*ممكن انت تقولي عليه؟!!

_كلامي عن الحب في زمنك

يختلف عن زمني زمان

بس المبدأ واحد برده

"حب"يسوي آمان وحنان

والحب ده عنوان للكون

كاس الحب ده كان "مزجّاتي"

اشرب منه وإياك تسكر

غرّق كل الدنيا بحبك

وإياك تغرق

*وانا ماغرقش معاهم ليه؟

_ههههههه قلبك طيب يا ابن الإيه

علشان انت الحب في قلبك

مصدر ليك

لو حولت المصدر عنك

صعب في يوم ترجع تلاقيه

*واللهَ كلامك حلو يا جدي

بس فهمنّي تقصد إيه؟

_فكر دايماً في بسمة غيرك

ومتستنش منهم حاجة

*طب وانا مين هيفكر فيا؟

_لما ربنا هيفكر فيك

عمرك يوم ما هتحتاج حاجة

طول ما الحب في قلبك..فيه.

.

*جدي ..بحبك"

_حبك اللي احببتني فيه

*جدي هنام

وهفتح باب حلمي للحب

_نام يا حبيبي

بكرة هنفتح ابواب تانية

هتوصلنا لباب الخير

عيش الحلم ثانية بثانية

اطفي النور ..ونوّر قلبك

يلا سلام

تصبح علي خير

جبل الدنيا

جبل الدُنيا أصبح سيرة
جبل الدُنيا أصبح ..موت
جبل الدُنيا..مات من الغيرة
قرب صورة الآخرة ب..zoom
جبل الدُنيا ده جبل
آمان
مشافش مواجهة ولا استسلام
فجمد قلبه في ساعة الليل
جبل الدُنيا ده جبل الخير
فتَّح ليك أبواب علي الجنة
وفتَّ لينا أبواب الحزن
بس خلاص هنسكت
هسس
يعني خلاص احنا هنتمني
نبقي معاك
وكفاية النية
هستناك ساعة الفجرية
صلِّي واطلع علي الجمعية
جهز كل شنط الخير
هنفرقها خلاص علي الغير
رح ترتسم البسمة عنيهم
مِدّ إيديك
تتمَّ إيديهم
خرًّج كل فلاش الكاميرا
من غير ..اكشين..او كلاكيت
خرَّج براءة الطفل في قلبك
مانتش..جِدّ
مُخرج عاش برات الصورة بيرسم حلم
مُخرج في آخر يوم كان عايشه
أصبح هو بطل الفيلم
أصبح هو بطل الفيلم

‫القاء بتراك علي الساوندكلاوك
https://soundcloud.com/kareenaa-kapoor/klmitixxyxfg

القاء بتراك خر علي اليوتيوب
http://www.youtube.com/watch?v=Hz9w32P42u0&feature=youtu.be&a

ربنا يرحمهم

مصر هي أمي؟!!

كل يوم بموت اعيشه

وكل يوم بعيشه اموت

الحياة دي زي ساقية

بتسقي كل حقيقة "زور"

بطلب السماح حبيبتي

رغم إني مش مسامحك

رغم إني في كل ثانية

شايف إني صراحة ..جارحك

خدّتي من أبويا واختي

خدّتي زهرة الشباب

خدّتي من كل الحبايب

سبتي مين من الصحاب؟!

حتي ابني..اللي لسة متولدش

اللي لسة جِفن عينه متخلقش

مات شهيد الاحتلال

احتلال فكري ونفسي

فطبيعي إنك تموت

حتي ولو كنت منطوي

عزرائيل صاحبك أوي

خبطاته كترت علي كل باب

والباب اصلا مالوش حدود

باب الشوارع والقلوب

باب النفوس

باب الجبال

قالوا إنك ليا "ام"؟!

مش مصدق ..استحالة

أنا لقيط في الدنيا ديا

بسبب إني ابن ليكي؟!!

طب سؤالي..ليه تخاصمي

لما اتصالح عليكي؟!

اشتريتلك ورد ابيض

واشتريتي ورد اسود

ضفتي لون دمي عليهم

فيلمك القديم ..خلاص

لونه ..دم الغزال

فيلمك الصامت ..بيدّن

والنهاية يا شهرزاد

صرخة أم تقول "مُحآل"

النهاردة في عزا صاحبي

بكره أهله عند أمي بيقولولها.."متصرخيش"

مات عشان يقدر يعيش

قالوا إنك ليا "أم"؟!

مش كلام ولا اشتغالة

انتي زي أمي تمام

كان زمان قبل أما انام

شموعها تحرق ضلمتي

تنورلي طريق الخير

ورغم وجع الحرق اللي

صرخت منه بأعلي صوت

تبتسم

وتقول:"يا ابني ..اوعي للحرام تعود"

اغضب منها واسيب البيت

تبكي ومبتقلش "ياريت"

وتستني مني اني اعود

وارجع ليها..

لما أحس بإن الدني"مافيش" بعديها

لما أتأكد ان وجودها شيء اساسي

حياة او موت

بس أنا أمي حرقتني

علشان تُهت ورحت بعيد..

إنتي يا مصر حرقتيني ليه؟؟؟؟؟؟

التسجيل الصوتي الخاص بالشعر علي الساوندكلاود
https://soundcloud.com/kareenaa-kapoor/jsyqmkpojyoq

19 فبراير 2014

المعاكسة

في ال talk shows بيقولوا

العالم ده بيتطور

والناس بتساير العصر

وال triangle بقي مدور

عندهم حق جداً 

وأنا شايفة ده بصراحة

بقي صوتنا يعلي عنداً

وبنرد بأباحة

وسواء البنت ماشية

بmini أو حتي tall

شكل المعاكسة بقت

مع الشباب قانون

شايفين إن البنت

غلط في كل شيء

إذا كانت ماشية بتتكلم

أو ساكتة طول الطريق

بيعريها في خياله 

ويحللها لهواه

وإن يوم في حد عابه

بيعيب هو الحياة

بيرمي التعليقات

ببرود وبدون حظر

علي لبسي وعلي شعري وطرحتي

حتي برده العيون وكسوفي في بسمتي

والمطلوب مني إني أسكت

وأمد فوق الخطوتين

اوابقي مجروحةجداً

واحس بعجز من كلمتين

أنا مش عشان بنت أبقي مسجونة في براح

ولا هزيد وأضيع عمر علي اللي راح

مش كل مامشي والاقي شاب أحس بالخطر

حتي لو لابسة كات وبكل المختصر

العيب مش عليا ولا عيب علي القدر

أصل زي مافي بجاحة

في "غض البصر"

عندي أمل

عندي أمل

عالي لفوق

فوق السحاب

ممسوك بطوق

طوق النجاة

عايز يعيش

وميتنسيش

يحقق شيء

من ألاشياء

 

 

عندي أمل

فوق الجبال

يصرخ مُحال

يسأل سؤال

ويقول جواب

غير السؤال

مستني اللي يفهمه

ولطريقه يرسمه

ويشغله بال

 

 

عندي امل

علشان حياتي تبقي حياة

اغنية ماتت

دم بدم

رصاص برصاص

ضاع مننا

الصبر خلاص

كنت بقول دايماً هستني

كنت بقول هحلم وأتمني

كنت بقول

كنت بعيد

وكأني كنت بغني

أطول أغنية

في اكبر مغني

مافيش كلام

"أنا هخرص مش هتكلم تاني خلاص

أنا هخرص علشان مافيش إحساس

أنا هخرص ضاع مني الأمل

أنا هخرس علشان مش لاقي حل"

 

 

كلام كتير شايفيه فوق

أيوة فوق علي السطور

ده أحساس فظيع

لما الشهيد

يحس في قبره بالندم

 

 

مش هخرص تاني

مش هبقي أناني

مش هسكت حتي

ولو ثواني

 

أصل أنا جوايا

إنسان تاني

لو مت هيصحي

من العدم

كُنت عاشق للأمل

دايما بحب الأمل

خايفة يوم أكرهه

طب وإيه العمل

عشقي ليه

وحبي فيه

جيه الظلم كسّره

هدمه

فجره

من جوا قلبي وعقلي

خرجه

 

 

 

 

 

أبعد بعيد

وأنسي الوعيد

وانسي أي معني كان

للحياة من جديد

 

 

 

كأن الدنيا بقت ظلام

ومافيش شمس تنوره

عاشق وكان في قلبه حلم

ومافيش مجال يحققه

 

 

ده شعبك يا مصر

اتحكم عليه اللحظة دي

 واتقتل

والأمل اللي كان أحلي حاجة فيا

 

من جوايا اتعدم

صوتك شهيد(3)

صوتك شهيد

مات في السيادة

مستني إنك تنتخب

غرفة إنعاشه الاعادة

 

 

صوتك شهيد

خلي الامل

بقي مُحتمل

والحلم جوانا

يكتمل

 

 

 

أصل اللي راح

أصبح جراح

ودواها لسة بيتعمل

 

ودواه إنه يطلع صباح

يشفي الجراح

يشفي الامل

 

أنا قلبي بقي حلمه الجديد

يرجع يعيش خالد سعيد

 

أنا قلبي بقي حلمه الجديد

مصر ترفع العلم

صوتك شهيد (2)

ونرجع نقول صوتك شهيد

أيوة شهيد

محصلش حاجة وأترمي علي الرصيف

وطلعله تعلب ويا ديب

وعشان الديب مش جميل

مد إيديه للتعلب الغتيت

 

 

والتعلب جاب رجليه

وطفاله نور عينيه

حب يهرب من التعلب

فمخرجش من البيت

فضل جوه البيت

غرقان ..كئيب ..حزين

زهق من الضلمة

ففتح الشباك

لقي بني آدم لكاك

بيوعده بوعود

علي شرط يبعيله الضمير

صاحبنا فرح بسرعة

وباعله من الشباك

وبعدين فتحله الباب

 

 

وبعدين قاله جعان

دخله جوه البيت

أكل سعادة البيه

ونفض إيديه كمان

وهرب من الشباك

وقفل علي صاحبنا الباب

ولا حققله شيء

 

 

صاحبنا عرف خلاص

إنه موهوم مخدوع

وقام في مرايته باصص

مسح من عينه دموع

قرر خلاص

يخرج للناس

جيه يفتح الباب

لقي المقبض مخلوع

 

 

تعب عشان يفتحه

لكن تعبه نجحه

ولما بص البرا

لقي الديب علي الجره

وهو كمان غتيت

ولا عمره هيريحه

صوتك شهيد

وإيه العمل؟!

مافيش أمل

أسكت خلاص

ده المحتمل!

 

 

 

أبعد بعيد

وشفيق يعيد

ينجح ويبقي

رئيس جديد

 

 

أسكت خلاص!

مافيش مناص

أقاطع...

هو ده الإخلاص؟!

 

أقعد أقول

أصل الفلول

طابخينها صح

ياعم (لول)

 

 

ولما أموت وسط الزحام

آجي في قبري ماعرفش أنام

أندم علي كلام متقلش

وكلام إتقال والسلام

 

ولما أقابل الشهيد

هقدر أرفع عيني في يعنيه؟!

هقدر أضحك من جديد!

 

دم الشهد اللي راح هدر

عشان إنت تدلي بصوتك

دم شهيد طول عمره حر

عشان متقفش تستني موتك

 

 

 

لو قلت صوتك مات

وخلاص مش هتنتخب

إرجع في كلامك قوام

قبل ما الفكرة تنتحر

اعتبر صوتك كان شهيد

مات عشان إنت تعيد

تفكيرك من جديد

ولمصر تنتسب

العصر الجاهلي

 

 

في العصـــــــر الجاهـــــــلي قالـــوا الصح

إنـــــــك تبـــــــات ظالــــــــــــــــــــــــــم

ولا تبــــــــــــــــتش يـــــــوم مظلــــــووم

إنـــــــــــك تكـــــــــون جبــــــــــــــــــــار

ولا يــــــــــوم  تكـــــــــون مهمـــــــــــــوم

 

 

لكـــــــــــــن ده عــــــصر جاهلــــــــــي

وده عصـــــــــــــر خلــــــص خلاص

واحنـــــــــــا فـــــي زمــــــن غيـــره

حســــــــــوا بقـــــــي بالنــــــاس

 

 

العظمــــــــــــــة بقي أســــــاســـــها

إانـــــــــــك لازم تفـــــــــضل كبيــــــر

كلمة صغــــــــيرة تتقـــــــــــــــــــــــال

وبسببها بحــــــــــــر دم يسيــــــــــل

 

 

آه يا زمـن علـــي اللي ضاع من عمرنا

كنا طُغاة جبابرة وماحدش كان قدنــا

تعدي السنين والفجور يزيد وسطنا

نقتل في نـــــــاس كل ذنبهم إننـــــــــا

عليــــــــــــــــهم كنـــــا أُمـــــــــــراء

عليهـــــــــــــــــــهم فرضنـــــأ إسمنا

 

 

 

ماعملناش هـــــم ليوم الحســـــاب

اللي هيجي وقته لنــــــــــــــــــــــــا

ويبقي الحساب مليان عتـــــــاب

ويبقي القدر مكتـــــوب لنــــــا

ده عملنـــــأ وده جزاءنــــــــــا

وده اللي ظلمنا بيه نفسنـــــــا

 

 

 

وبعد ما الوقت فـــــــــــــــــــــات

بندعــــي يا رب إغفر لنــــــــــا

عشنــــــــا حياتنا كلها عنــــــــاد

نسينــــــــا نهاية عمرنـــــــــــــا

نتبري من السيئــــــــــــــــأت

نتمني حسنــــــــــة ترجــــع لنـا

انا إنسانة

 انا إنسانة يا مصر فيكي 

 وعلي نياتي ماعرفش شيء

 لا في سياسة ولا في غيره 

ولا أي حزب أو حزبين

 بس نفسي أشوف فيكي 

شمس الأمل وبهجة العين

 نفسي أشوفك عروسة زمانك 

بفستانك الابيض ويا إنسجامك

 نفسي اشوف اهلك متهنين

 ولكن ليه في فرحك ميتم 

والنقط السودة في فستانك مبتنتهيش 

جالنا يوم ملكتنا الفرحة 

قولنا خلاص هتلبسي الطرحة 

فرحت أوي وويا جنوني

 قل الفرح وزاد شجوني

 واتملي الدمع في عيوني

 وفي عيون الشعب اللي 

 قال الحق وحب يعيش