عسكر وحرامية

نقطة ماية تساوي حياة

إلا في بلدي تساوي الموت

نقطة ماية..حلم وضايع

بس في بلدي الحلم..كابوس

نقطة ماية

جات فيعنيا

بسمةأمل اطرّحت فيا

جيت أرويها..و أخليها

شجرة في جنة من الحرية

ضوء الضلمة مكنش رحيم

جرح أوراقها

قبل ماتطرح لينا الورد

وقبل مانجني الأحلام

كل العزم في ثانية انهد

كل ورود الحب في بلدي

مقطوفة ومش مجنية

كل رموز القوة الصادقة

بتلعب بينا"استغامية"

و إحنا ندوَّر مش لقينّها

الخلاويص راح تخلص منّا

الكداب صادق قُدامنا

فالصادق أصلاً كداب

ولمّا لقينا الصادق فعلاً

من كتر الخوف كدبناه

كل البلد غاوية اللعب

وشادة شريط اللون الأسود

علي عنيها

ومغمية

كل البلد لمّا زهقت

لعبت عسكر وحرامية

26 فبراير 2015

وقلبك

وقلبك لو ضحكلي في يوم

تكون الدمعة سبّاقة

وقلبي لو ماليني هموم

بحُبك ينسي كالعادة

وعشان حاجة

تضيع حاجة

مبحتجهااش غير في البُعد

برغم إنك محتاجة

تكوني بعيد

رجعنا لبعض

و لية أصلاً لُقانا ده عيد

تملّي مُقيْد بالمواعيد

ومش محتاج أعيد و أزيد

وأقولك تاني :"إية الحل"

بجد لماذا وعشان إيه.؟

لعل البُعد أصلا خير

لعل الحب أصلاً عيب

لعل العيب مالوش في الحب

لعلنا قصة متعادة

ف بزيادة

شعب عجب

شعب قادر

شعب تتغير صفاته

شعب معني الحياة

يتلخص من بين آهاته

شعب مستني الفرح

رغم دمع علي خده سايل

شعب ساذج

شعب كل ما يقول "آه" منّهاا.بيسب فيها

ولمّا غيره فيها يشتم

يلعنه ويسب فيه

مين معاه اللي في إيديه

لما يحكمه عبيد؟!

مين مسامح في اللي فات؟!

مين مخطط للي جاي؟

ثورة ثورة..ولا نخاف

وخوفنا كان أساسه ضيّ

شعب بيحب يخبي

و علي الجراح يدوس يعدي

عادي جداً فيلم تافه

كل فشار

قزقز لب

شعب يحس بالآمان في سجدتين

ويطلع من الجامع يسب

إلا من رحم ربي

شعب أصله من العجب

2014

قلبه فاضي

لسة جوه قلبه فاضي

خاف يراضي ..فيخسرهُ

خاف يداري .فيكسره

خاف يصارح

أو يصالح..قلبه اللّي عاش زمان

خاف يقرْب من المكان

خاف يحس بالأمان

فينسي إنه يكون حويط

أصله لمّا كان صريح

وكان علي حبه حريص

فجأة جه اللي يدمره

ف لسة جوه قلبه فاضي

و لسة عمره بيخسره

عن

عن احاسيسي الظريفة

واللطيفة والطريفة

والخفيفة ع السامعين

عن حبايب بتناديهم

وتلاغيهم

ووتشاغلهم

وتحاملهم

ومرة لو حبيت تقرب

يسألوك فجأة "انت مين"

عن حاجات ملهاش علاقة

وكلام من غير لباقة

وعن مشاعرك لما شفت

صورتك الحلوة في بطاقة

فمن ملامحك فجأة خفت

ورحت قايل "صورتي فين؟!"

عن كلام عمرك ما قولته

وعن حاجات ماتتحكيش

وذكري مهما حاولت تنسي فيها..مبتتنسيش

عن سعادتك في الدقايق

رغم وجعك في السنين

انت حد مهما يلقي

صعب في يوم يتقال حزين

لو عايز تبكي

والقلب الطيب لو شايل

في هموم الناس

لسّاه قادر..يشيل همك

قوللّي ال فيك ولا يهمك

هقدر لو خايف إني ازعل

علي زعلك..وازيد في التفكير

مبقاش زعلان...

لو عايز تبكي..كمان جايز

انا ابكي معاك

لو عايز تبكي بمشاعرك

وملامحك تصغر بالتجاعيد

أنا "ٌقلب" دقاته ‫#‏انغام‬

تعزفلك نغمة علي زوقك

تسمعها وترجع فيها تعيد

مانا ممكن برده مكنش ‫#‏سعيد‬

لكن قادر أسعد غيري

الحيرة وطولة التفكير

مفاهيم محتاجة لضميري

انا فرحان جدا من فرحة ليك

سببها وجودي وانا معاك

انا عايز نكبر في التفاصيل

ونزيد ونعافر في الاحلام

متخفش الدمعة اللي في عيني

مش معناها كوني حزين

ولا شفقة عليك

ولا حنية

معناها اني قادر افرح

رغم ان في عيني الدمعة ديّا

يكفي يعني

التراك علي الساوند كلاود

https://soundcloud.com/kareenaa-kapoor/tghidnggavrl

يكفي يعني

إن حبي ليك واجعني

و إني انطق!

ده استحالة

حبنا في مية ألف حالة

يوم اسيبك

يوم تسيبني

ترجع أشواقي تجبني

ونتكلم بإسم الصداقة

عادي جداً وببراءة

صقفة جامدة للحباقة

وكل اللي ليك واخدني

واعتراض بدون سبب

علي كل شيء بدون اسباب

حبك مخادع وياه العجب

فتح ابواب بدون مفتاح

و إني انطق!

ده استحالة

حبذا لجوئي لصورتك

او لصوتك في في ارتجالة

للاغاني ولمشاعري

يكفي يعني إن حبي ليك واجعني

يكفي يعني إن حبي ليك

واجعني

شفت فيك..

شفت فيك حقيقة اكبر 

من الملاك اللي في خيالي

شفت فعل ماضي لكن

الواقع كسر كلامي

من يومين انا كنت بقسي

علي نفسي وأحن ليك

كنت تافهة يوم ماجيتلك

واعترفت بحبي ليك

لية سقطت في الاختبار؟!

حبك لو اصبح قرار

يبقي محسوم النتيجة

لكن حبك ده قدر

والنهاية مش سعيدة

صاحبتي

انا عايزة اقرب منك ساعة

تحكيلي ونغرق في التفاصيل

تشكيلي فنضحك واشكيلك

منك واغضبلك فمتبكيش

انا عايزة اكونلك شماعة

للحزن بتكسر طعم الخوف

انا ببعد فجأة مبعرفنيش

ولا اقدر اقولك "اصله ظروف"

معلش "انا آسفة" علي التقصير

احلامي بتقلب بالكوابيس

وواقع بيتحقق من الاحلام

انا عايزاكي تقوي وتتماسكي

لغاية ما ارجع لطبيعتي وانام

أنا ليه...؟

أنا ليه وسط الضلمة كنت شايفة

وخفت من النور وتُهت

أنا ليه حبيت شيطان

مع إني بريئة جداً

ومنه ولا عمري خفت

أنا ليه حزني صغير

رغم إن في اسباب كتير

للحزن عشان يطوُل

أنا ليه مبكتبش عنّي

رغم إن حبر قلمي

خلصان علي السطور

أنا ليه أصلاً كده

بعنيا مكنتش شايفة

ولما غمضت شفت

في 21مايو 2014

زي بحر

زي بحر كنت بغرق فيه بحب

زي قلب مات وساب فيا نبض

زي روح عايشة فيا 

اكتر ماهي عايشة فيك

زي شمس عاشقة ضلك

وعنه ما جالها يوم غروب

فبالتالي كان الشروق في إنها تفضّل كده

كانت عبيطة وطيبة

كان الحب منها خايف 

إنه يقرب ..تحس بخوف

فليه قسيت؟!!

ليه هجرت قلب طفلة

علي الدنيا كانت أقوي

من ألف واحد شعره شاب

كانت بتستقوي بحنانك

وبرده عاملة ليك حساب

كانت حروبها للسلام

ولا عمر حرب كانت لحرب

ملامح شخصية شرقية

ليه جيت وفضّلت الغرب

فسلام أمانة عن عزوفك الحياة

سلام لقلبك

لو لسة قلب

في 18 مايو 2014

تسمحيلي..!!

تسمحيلي ...!؟

تسمحيلي أمسك إيدك

لما كل الناس تسيب

وابقي ضلك

ابقي سندك

هابقي اكتر من حبيب

تمسحيلي..تبقي مَلْكي

بالكلام أو بالسكوت

تسمعي مني حكايتي

تغرقي فيا وفي حبك تسبيني أموت

ويبقي ضيّ عيونك دول مرايتي

تسمحيلي..!؟

تسمحيلي ابقي شايف

الدنيا بنظرة عنيكي

تمسحيلي ابقي خايف

واطمن بلمسة ايديكي

تسمحيلي اكون مسؤل عن سعادتك في الحياة.!

اكون سفينة وطوق نجاة

وانسي إني من البشر

تمسحيلي اكون "ملاك" جوا بيتي

لمّا يبقي برده بيتك

تسمحيلي..!؟

في 12 ابريل 2014

قصاقيص

صراع نفسي

مع نفسي

عشان متعبش يوم نفسي

بحبك بس كان نفسي

يكون الحب ده مقبول

صراع من تاني جوايا

بداية حب ونهاية

لنفس البطلة والفارس

حكاية بتحكي ورواية

بتتعاد كل يوم بالدور

وانا وانت...

بنبعد تاني ونقرب

ونهرب قد ما نهرب

ونرجع نلقي اشواقنا

كانت مع البُعد بتكبر

وترجع تاني قصتنا تسمعنا لما نقول..

"انا بحبك

انا عشقتك

انا معاك وملكك علي طول

انا هبعد

انا هنسي

وهصحي من الحلم

واقوم"

ونرجع تاني نتلاقي

في عصر من عصور بلقيس

اكون "جولييت"تكون "روميو"

اكون "ليلي" تكونلي"قيس"

وهيجي اليوم وهنحكي

قصتنا لاولادنا

وهيعرفوا ان قصص الحب

مرت في حياتنا

..قصاقيص..

عمو حامل

عمو حامل كل خير

عمو بيحب بضمير

عمو بيدعلنا الدعاوي

واحنا بنردد آمين

عمو بيه يشبه غفير

أو غفير اصله بيه

عمو اصلا يبقي مين؟؟

قالو في الزمن القديم

اللي مالوش دايما كبير بيشتريه

وعمو ده شخص في خيالي

ضميري بيتحامي فيه

احساسك دم

عن ناس بتّسبْ عشان بتحب

في الحب وكل اللي يحبوا

عن ناس خايفة تعيش مبسوطة

ف فكل الماضي والاحزان

غرقانة ودايما مربوطة

عن ناس حوليك وفي كل مكان

وكتير قُدّامك بيعدوا

بتشوفهم تضحك وتخاف

مش عارف إيه سبب خوفك

احساسك من الآخر كان

بيتخطي كل حدود شوفك

فتقرب والدمعة بتجري

علي خدك زي سباق الخيل

وصهيلها بيضرب أوتارك

فبتعزف نغمة في عز الليل

وتصحي الناس في عز الفجر

مع إن الشارع كان الضهر

فمشاعرك كانت ضلمة عليك

الناس قدامك مش حوليك

ودموعك لسة بتشبه سيل

احساسك دم كان بيسيل

من جرح الناس قبل جروحك

قربت خلاص اكتر منهم

هتسلم وتمد إيديك

علي ناس اصلاًَ ولا تعرفهم

حزن عنيهم شدّ عنيك

خطواتهم سكنت من الواقع

أحلامهم كانت مرئية

كلها كانت تحصيل حاصل

بتعافر في اللامنسية

فكان قُربك ليهم هو الحل

خافوا تبعد فيتوهوا من تاني

وفضَّلوا ميبقاش بينكم قُرب

والبُعد ده كان أقوي اناني

وفي ثنية داستك عربية

وكانوا هما خلاص عنك بعِدوا

في 6إبريل 2014 

رغم إن مش اسمك حنان

مع كل بسمة "كدب" علي وش بترتسم

معاكي انتي بس بحس بقلبي بيبتسم

جواكي التلاقي بين مشاعري والحياة

قلبي الساكن في صمته بيتحرك لمنتهاه

قلبي لتايهة في حرته

عمره ما فقلبك يوم تاه

انتي دايما بتجْمّلي فُقدانك للي راح

ليكي دمعة في الفرح

وابتسامتك شيء اساسي في الجراح

انتي اقوي من مجرد الوجود

معني الحياة متجسدة في صورة "أنثي"

بتعلّمي ازاي السعادة تعيش

والحزن بداً لا يُنسي

بس ازاي بتجمّليه

فعليه بنحمد ربنا

إنه اختبرنا في الحياة

ولعله كان من حقنا

تعويض لغلطة كانت في الزمان

أنا لسة طفل في حبك بتعلم أعيش

وفي قلبك الغويط لسة بكتشف المكان

أنا بيكي بس رغبتي بتزيد في الحياة

انتي "حنية الكون" رغم إن مش اسمك حنان

شبك حلمك في حلمي

شبك حلمك في حلمي

شبك حلمك في حلمي

نلقي الاحلام سوي

لو يوم في جرح علِّم

بالفرحة هيندوي

شبك طموحك يا عمي

والزق قصاقيص فرح

علي وشك يا ابن عمي

الفرحة هتنطرح

متقلش إنك ناسيني

واعمل نفسك فاكرني

هات عينك جوا عيني

واحكي وبعديها سبني

ولو يوم حسيت وجودي

كان أكبر قوة ليك

ارجع ولو كنت همشي

الحب هيناديك

شبك حلمك في حلمي

نلقي الاحلام سوي

لو يوم في جرح علِّم

بالفرحة هيندوي

وانتي يابنت خالي

حبك ساكن في بالي

والحلم في يوم نداني

بإنك أم العيال

خيال يمكن حقيقة

وحقيقة يمكن خيال

انا عايشك كل ثانية

وبسمع منك حكاوي

بتغني احلي غنوة

فبعدت عن القهاوي

صمتك جوايا ..يحكي..

وعيونك بيتناديني

عايزة تكدّبي حلمي؟!

هاتي عينك جوا عيني

واعترفي انك مريضة

وانا حبي كان الدوا

شبكِ حلمك في حلمي

نلقي الاحلام سوي

لو يوم في جرح علِّم

بالفرحة هيندوي

بس انا حلمي اتسرق

وانتي حلمك كان ورق

ضاع بسرعة مع الهوا

ضاع بسرعة مع الهوا

مالوش لزوم

لو في يوم قدرت اسيبك

يبقي احساس اللي قالي

إن وجودي زي عدمه

وإن قربي مالوش لزوم

بس_حبي_راح يدوم

غصب عني وعن إرادتي

ليك عندي اكتر من دعوة

كل يوم

وكل دعوة بحرف اسمك راح تكون

"بيك هسامح اللي باقي من حياتي"

"هبقي باقية علي اللي فات"

"اوعي يوم تنسي اللي فات"

"همزة علي سطر _حبك_ليها طعم وذكريات"

اللهم اهدِ قلبهُ اللي لسه انا ساكنة فيه

وكل دمعة من عيونه 

تبقي بس في السجود

ابعد عن قلبه الهموم

وتبقي فرحته بزيادة

يبقي قربه ليك يا _ربي_

هو أحلي وأنقي عادة

عن جدارة واقتناع

ميقربش للضياع

الملاك في قلبه ساكن

وبرده جواه الشيطان

زي غيره

وزي_احنا_جوا منا

ملاك

شيطان

لكن واحد فيهم_أقوي_من النقيض

بس "هو"مش أكيد

عنده احساس التساوي

لكل معايير الوجود

عنده طيبة جوا قسوة

ورزانة في الجنون

__مش مهم__

الاهم.في اللي اقوي من التناقض

والصراع جواه يناقض

يعني يوم يكسب شيطانه

تاني يوم يغلب ملاكه علي الشيطان

يبقي نادم علي اللي فات

يملي دمعه العيون

يبقي خايف من اللي جاي

يحدف الايام بطوب

يتكسر بيته الازاز

ثانية ثانية..انسي انا كل اللي حاصل 

ونرجع اقوي من اللي فات

ثانية تالتة..ارجع احس ان وجودي

مالوش لزوم

9فبراير2014

طريق للحب

أنا بحبك!

إذاً أنا عايش

حتي ولو مجروح

إذاً أنا شايف

البسمة وسط جروح

بذكري ليا وليك

جمعتنا لثواني

ومكنتش انت شايفني

ولا كنت قدامي

أصل حبيبي الحب

جسر لعبور عاشقيه

وإن شفت غيره طريق

...اهرب-قوام عديه..

ده الجسر مش مضمون

ومتكسرة خطاويه

وأن بِتّ يوم مهموم

مش شرط تصحي تمام

وإن عشت يوم تعبان

بنفس الحالة هتنام

..لو حبك كان ضرير..

فلو شفت غيره طريق

..اهرب-قوام عديه..

ده الجسر مش مضمون

ومتكسره خطاويه

حوار تايهة

_ممكن متبنش صحيح قلقان؟!

*بس أنا تعبان أوي من غيرك

محتاجك جمبي زي زمان

محتاج أعيش بتفكيرك

_بس أنا......

*استني هكمل احلامي

مش ضامن بكرة لما اصحي

أشوفك تاني قدامي

مش ضامن إن انا أصلاً

دلوقتي في واقع مش حلم

من غيرك في الدنيا أنا تايهه

لا نافعلي خيال كان أو علم

_استني اسمعني ولو ثانية أنا....

*توعديني إن وجودك جمبي يزيد؟

_صعب أكون جمبك علي طول من غير تبرير

*يعني هتمشي؟

_يمكن أفضل

*شايف البعد ما بينا بيكبر

اسمعي احلامي ولو كلمات

قبل البعد ما بينا يطول

أنا شايفك في عيوني ملاك

بيه بشوف في الضلمة النور

_أنا جمبك جواك مش هبعد

محتاجة أحسك مطمن

أنا فكرك 

احساسك

قلبك

لو يوم حسيته بيتحول

*بيتحول ؟؟ ازاي يا عجيبة؟

_..................

*أنتي فين؟

رحتي.......مشيتي؟

قلتلك احكي الحلم بسرعة

قلتي مش ناوية علي الغيبة

وصحيت ممنوع أنا من الرؤية

علشان انتي بقيتي بعيدة

أكبر كدابة أنا حبيتها

واكتر صادقة في يوم حبيتني

قلت ياريت  اعيش الحلم

ضاع الحلم

وفضلت "ياريتني"

1/1/2014