a tiger cat

لو عايز تبكي

والقلب الطيب لو شايل

في هموم الناس

لسّاه قادر..يشيل همك

قوللّي ال فيك ولا يهمك

هقدر لو خايف إني ازعل

علي زعلك..وازيد في التفكير

مبقاش زعلان...

لو عايز تبكي..كمان جايز

انا ابكي معاك

لو عايز تبكي بمشاعرك

وملامحك تصغر بالتجاعيد

أنا "ٌقلب" دقاته ‫#‏انغام‬

تعزفلك نغمة علي زوقك

تسمعها وترجع فيها تعيد

مانا ممكن برده مكنش ‫#‏سعيد‬

لكن قادر أسعد غيري

الحيرة وطولة التفكير

مفاهيم محتاجة لضميري

انا فرحان جدا من فرحة ليك

سببها وجودي وانا معاك

انا عايز نكبر في التفاصيل

ونزيد ونعافر في الاحلام

متخفش الدمعة اللي في عيني

مش معناها كوني حزين

ولا شفقة عليك

ولا حنية

معناها اني قادر افرح

رغم ان في عيني الدمعة ديّا

a girl of darkwhite

وفي الجمعة

وفي الجمعة

ويعشق مطرة سماعة

لدقات طبلة الفرحة

واقوم مشتاق

هقابل ناس

واعدي طريق

وهسجد سجدة بطعم العيد

واقوم ناسي إن انا فاكر

بإن الشيخ ماهووش خاطب

وان الدنيا اصلا صيف

وان الشمس دي عروسة

شعاعها معدّي الطرحة

ف أكون زعلان

واقوم فاكر ان انا ناسي

بإني ماعدتش زي زمان

ونسيت اقرا سورة الكهف قبل مانام

انا قلقان

ماهو لو بس كنت اعرف

بإني هنام من بعد الماتش

مكنتش اصلا اتفرجت

صحيح..!

الماتش كان كام كام؟!

#كاري

19-9-2014

الحب

الوقت بيهون البعاد

ويعلمنا إن اللي باقي لينا

هما حبة ذكريات

لكن إنتْ بُعدك مش كدة

عدت عليا السنين

ولسة كل يوم بيمر

بصحي علي حرف اشتياق

ده الحب لحظة من العناد

بتصاحب لحظة من الجنون

لو قرب كان او كان بعاد

شعاره أكون أو لا أكون

الحب أقوي من الفراق

وبيت قصيدة بدون حروف

وشعبه تايه في البلاد

ماسك قلوبه من الوجع

الحب مش صاحب جدع

لكنه مش ندل كمان

الحب لو عوزته تلاقيه

يقفل قصادك البيبان

والحب لو سبته يلاغيبك

يفتح قصادك الف باب

الحب فرحة ومحزنة

فبلاش تعوز من الحب شيء

غير إنه يبقي ليك آمان

تلقي العيون متبسمة

تلقي القلوب متكلمة

وتلقي الحبايب متجمعين

علي دعوة حلوة في الختام

حتي ولو مكنوش سوا

الحب بيت فاق الحدود

من غير سطور ولا مصرعين

فبلاش تعوز من الحب شيء

غير إنه يبقي ليك آمان

colors

رسمة بقالها سنة وشوية

اول رسمة بالماية

وآخر رسمة لغاية دلوقتي

يكفي يعني

التراك علي الساوند كلاود

https://soundcloud.com/kareenaa-kapoor/tghidnggavrl

يكفي يعني

إن حبي ليك واجعني

و إني انطق!

ده استحالة

حبنا في مية ألف حالة

يوم اسيبك

يوم تسيبني

ترجع أشواقي تجبني

ونتكلم بإسم الصداقة

عادي جداً وببراءة

صقفة جامدة للحباقة

وكل اللي ليك واخدني

واعتراض بدون سبب

علي كل شيء بدون اسباب

حبك مخادع وياه العجب

فتح ابواب بدون مفتاح

و إني انطق!

ده استحالة

حبذا لجوئي لصورتك

او لصوتك في في ارتجالة

للاغاني ولمشاعري

يكفي يعني إن حبي ليك واجعني

يكفي يعني إن حبي ليك

واجعني

شفت فيك..

شفت فيك حقيقة اكبر 

من الملاك اللي في خيالي

شفت فعل ماضي لكن

الواقع كسر كلامي

من يومين انا كنت بقسي

علي نفسي وأحن ليك

كنت تافهة يوم ماجيتلك

واعترفت بحبي ليك

لية سقطت في الاختبار؟!

حبك لو اصبح قرار

يبقي محسوم النتيجة

لكن حبك ده قدر

والنهاية مش سعيدة

كدب وخوف وحب

الكدب ساعات

دايما اوقات

بيفرح لكن مبيطمنش

و الخوف من القول

دايما علي طول

بيطمن لكن مبيسعدش

و الحب كمان

في زمننا ساعات

بينسي ازاي هتموت لو عشت

محتاجاكِ

محتاجة اضمك من سكات

وانسي اللي فات

وجروحي..تتكسر في روحي

بدون ماحتاج للمعجزات

طبطبي علي نفسك اوي

وابكي لكن متطوليش

معجزتك الحقيق انتي

فضميها علشان تعيش

الاسرة

بصراحة في كتير مننا أتأذي بسبب اهله

اولا:في اللي اتأذي من إنهم منعوه من حاجات كتير

أ)بعضها حاجات لو عملها كانت هتضره فعلا بس هو مش مدرك ده

ب)بعضها حاجات كانت هتنفع جداً ولإنه معملهاش كان ده ضده

لكن في الحالتين فالمنع أساسه الخوف و الخوف اساسه الحب

ثانياً:في اللي إتأذي بسبب انه سمحوله يعمل حاجات كتير

أ)في اللي عرف معني الحرية دي وقيمتها واستخدمها صح

ب)وفي اللي كان عارفها بس كان محتاج للمُرشد فتجاهل الحرية الصح واستخدمها غلط

وفي الحالتين ف الإباحة وعدم المنع كان أساسها خوف اساسه حب برده

بس تشكل علي قدر من الحرية هدفه تكوين شخصيتك

ثالثاً:في أهل دايماً عايزيك في أعلي مكانة

فغصب عنهم مبتحسش منهم بأي رضا للمكانة اللي انت بتوصلها

وتلاقي دايما بيبصوا للسلمة اللي فوق السلمة اللي انت واقف عليها

رابعاً:في اللي اهله اصلا غلط

واللي بيشوف منهم الأذي صريح وبدون مبررات

سواء في حقه او حق نفسهم

................................................

في كل الحالات دي احنا مش هنعرف نغير من اهالينا ولا نغير من شخصيتهم غيير بنسبة صغيرة جدا وده لو كنا عباقرة في التعامل اصلا

فمش قدامنا غير التأقلم مع استمرار المحاولة

استمرار محاولة تغيرهم

والتأقلم مع الوضع الحالي حتي يحدث تغيير

و لإننا منقدرش نغير غير بنسبة قليلة  فيهم "ومع ذلك علي الاقل لازم تحاول توصل للنسبة دي..صدقني هتفرق في حياتك"فاحنا مازلنا نقدر نغير بنسبة كبيره فينا

فلازم ناخد بالنا كويس اوي من كل شيء وسلوك كان بيإذينا من اهلنا

ونفكر كويس امتي كان معاهم حق

وامتي كنا احنا علي حق

ومنكررش ده في المستقبل مع الاولاد والاحفاد

هتقووووولي "يوووووووه هو انا هفكر فيهم من دلوقتي مش لما اعيش لنفسي الاول"

لا يابرنس مانت لو فكرت ازاي تعيش صح من دلوقتي هتكون بتفكر فيهم كمان

مهما كان اللي انت عايز تعمله هتعمله

سواء في منع او حرية

بس ده مبيحصلش بشكل مطلق غير بإنك تضحي

هتسألني اضحي بإيه

هتضحي بوجود اهلك في كيان حياتك

وهتكون عاق وعاصي ليهم

وبيتهيألي ده مش هدف اي حد مننا "وصاحبهم في الدنيا معروفا"

بس لو انت عايز براحتك

مش هضربك علي ايدك

انا مش ماما

بس التضحية دي مصحوبة بتضحية اكبر

وهي "دينك"

ولتوضيح النقطة دي

خش علي المقال ده:

http://kary-angel.blogspot.com/2014/08/blog-post_87.html

حزن الحب

جماعة مش بقيت حاجة مستفزة اوي ان حد يحب ويتجرح ويقول عمري ما هحب تاني

(عمري ماهحب تاني)

لا حظ انك بتتكلم في المستقبل

المستقبل ده انت عارفه؟

متاكد من اللي هيحصل بيه؟

ليه بتحط قرار بكل ثقة كده في حاجة انت ملكش دخل فيها اصلا

اللي ربنا عايزه هيكون سواء انت عايز او لا

غير كده قلبك مش بايديك واللي بيقول قلبه مات

اقوله وجودك وسطنا اكبر دليل علي انك حي

ياريت منحطش قرارت المستقبل علي جرح الماضي او الحاضر 

لو اللي فات انتهي 

لسة اللي جاي هيبتدي

بلاش ننهيه قبل بدايته..

لو اللي فات جرحك

يمكن انت كنت تستاهل الجرح ده عشان تتعلم

او يمكن انت كنت مستاهل تتعلم من الجرح ده عشان متنجرحش تاني

لعله خير :)

كبيرة عقوق الوالدين

بسم الله لرحمن الرحيم

"وقضي ربُّك ألا تعبدوا إلا إياه وبالوالدين إحساناً"

صدق الله العظيم

أولا:في #فضلهما

قال تعالي:

"إما يبلغن عندك الكبر أحدهما أو كلاهما فلا تقل لهما أفٍّ ولا تنهرهما وقل لهما قولا كريماً واخفض لهما جناح الذل من الرحمة وقل ربِ ارحمهما كما ربياني صغيرا"

والفضل دايما للمتقدم

ولا يقع التساوي

يعني مهما عمل الاولاد من خير للاهل فمستحيل يتساوي مع خيرهم علينا

طب في نقطتين كده

واحد:

في ناس كتير بيبقوا منتظرين حاجات معينة من الاهل ولما مبتحصلش بيحسوا ان اهلهم معملوش شيء من اجلهم في الاساس

نصحي هنا شوية..لأن الاهل بيعملوا وبيعملوا كتير بس احيانا انت بتكون مستني منهم الشيء الغلط

واحيانا من خوفهم عليك بيمنعوا عنك شيء صح

واحترامك للهدف مش للوسيلة

اتنين:

في اهل فعلا كل تعبهم اللي تعبوه عشانك في الدنيا هو يوم الولادة

واول شهرين حمل

واخر شهر 

والباقي ولا يعرفوك

لكن ربك قال اية :"وصاحبهما في الدنيا معروفا

................................................................................

قال الرسول صلي الله عليه وسلم:"رضي الله في رضي الوالدين وسخط الله في سخطهما"

#الجهاد في الوالدين

عن ابن عمر رضي الله عنهما قال:جاء رجل يستأذن النبي صلي الله عليه وسلم في الجهاد معه,فقال النبي صلي الله عليه وسلم:"أحي والداك؟قال:نعم.قال:ففيهما فجاهد"

وطبعا فاكرين موقف آخر لما الرسول ردرجل أتي لطلب الجهاد لأنه ترك ابويه يبكيان وطلب منه يضحكهم زي ما أبكاهم

فضل بر الوالدين ااكبر من فضل الجهاد

ده يخلي المخ يلف شوية

لية معظم الشباب بيفضلوا ما في اعتقداهم جهاد علي بر الوالدين؟

و كيف يكون الجهاد في الوالدين"

للأسف معظمنا سرقاه السكينة

وحابب يشوف نفسه بعيون نفسه..مجاهد في سبيل الله وثورجي وضرب ده بسيكنة او عور ده ..وعلم علي ده وغيره وغيره وغيره

يمكن لان كتير مش فاهم الدين صح

او كتير بيتجاهل اللي فهمه من الدين صح عشان غروره قدام نفسه

استني يا حجة ازاي غرور.. غرور اية دانا بموت..

اه تصور غرور.. ورياء كمان "والرياء من الكفر علي فكرة"

ولو فعلا جهاد فانت عارف الاصح

اهلك مش موافقين؟!!

تبقي حاجة من الاتنين

يإما انت اصلا علي سكة غلط شايفها صح

يا إما خوفهم زيادة وإيمانهم اقل ..وساعتها يبقي جاهد فيهم

ازاي؟

بإنك تقنعهم بالصح

بإنك تخلي إيمانهم اقوي

موضوع صعب اووووووووي..بس الجهاد مش سهل

وبيتهيألي الجهاد في الوالدين مش كده بس 

في بعض الاباء بيبقوا علي باطل اوقات كتير

الجهاد فيهم

تحمل آذاهم

وحملهم علي الحق قدر المستطاع

اشكيهم لربنا

مش للناس

ادعيلهم

ولا تدعيش عليهم

....................................

ومش بستثني نفسي من شيء

احنا جيل الخير جواه موجود بس الضلمة مغطياه اوي

جيل كاروهات كده 

ربنا يصلح حالنا

..................................................................

و اخيرا:

قال رسول الله صلي الله عليه وسلم:

"لا يدخل الجنة عاق ولا منان ولا مدمن خمر"

"لعن الله من سب اباه,لعن الله من سب أمه"

"كل الذنوب يؤخر الله منها ما شاء الله الي يوم القيامة إلا عقوق الوالدين فإنه يُعجل لصاحبه"

صدق رسول الله صلي الله عليه وسلم

يعني العقوبة في الدنيا قبل يوم القيامة

يعني لو حياتك حاسس انها زفت

راجع نفسك كده يمكن معملتش اللي يخليك تستحق حياة افضل

^_^

حاول

اكتب كل مشكلة في حياتك وعقبة علي ورقة 

واكتب اية اللي انت حابب المشكلة تنتهي عليه

اكتب في ضهر الورقة كل الحلول الممكنة

اكتب اللي تقدر عليه من الحلول دي

نفذ اللي تقدر عليه

وسيب الباقي علي ربنا

جمع الورق ده

وكل ما تعمل اللي تقدر عليه في مشكلة

ارمي ورقتها

وبكده تلاحظ ان مشاكلك بتقل ماديا 

قبل معنويا

بم اننا في عالم مادي شوية

I'm just a girl

بالقلم الرصاص

بعد التحديد

بعد تلوين الشعر

بعد تلوين الوجه

بعد نهاية التلوين

النتيجة النهائية مع الرسمة اللي المفروض انها الاصل يعني :)

............................................................................................

بعد اللقطات عن قرب اثناء مراحل الرسم والتلوين مع بعد التعديلات