من القصائد اللي كتبتها وحبيتها وحستها
وزاد اعجابي بيها بعد مشاركة صديق من أعز الاصدقاء والاقرب إليّ
لتتحول في نظري الي شيء للتاريخ
اترككم مع جزء من بداية تدوين التاريخ...
:
:
Kary
خلاص مش هسأل أنا تاني
عليك أو حتي علي نفسي
ولا هفكر تاني في يوم
أشوف أسمك معاه أسمي
ولا هحلم واعيش الدور
بإني أميرة الحكايات
ولا رميْ شعري فوق السور
هيقصّر بينا المسافات
ولا إنك حلم ولا حقيقة
ولا حتي كنت في يومي خيال
ولا إني طفلة وبريئة
ولا عاملة فيها عال العال
ولا من النهاردة في اي يوم
هنادي اسمك بصوت عالي
واسهر واعد النجوم
ببساطة انا كنت في يوم
انانية
وفي حبك كنت منسية
واستاهل اللي يجرالي
ولا حقي إني في يوم أبكي
ولا أشكيلك علي حالي
لكن علي الاقل اشكيلي
واحكيلي
فرّغ كل أحزانك
علي كتفي
ومش همشي
إلا وانت سعيد
او علي الاقل مانتش حزين
لكن ياخوفي لانا احكيلك
واشكيلك
وتسيبني
والضحكة جوايا وتروح
وجواك الحزن مالي الروح
يا حبيبي بجد انا غلطانة ومش هنساك
وانت اللي بجد كنت ملاك
:
:
:
Bahaa C Alex
يا اجمل حد فى الدنيا
اسمع الكلام الى جواياا
مرحتش عن بالى ثانية
بفكر فيك بلا نهاية
لو كان الحب له لسان
كان يحكى على اجمل حكاية
معا انى معرفش ليك عنوان
هتفضل فى قلبى هنا معايا
هتفضلى علطول اميرتى
الى مش حتدخل مدنتى
بس
الاميرة محتاجة الامير
والامير من غيرك اسير
طفل محتاج حنان
امير وادى الاحزان
ولا حلم ولا حقيقة ولا خيال
مين الى صرخ وقال
صامد لحد ماموت
حالف ما وعده يفوت
انا مش بستسلم
واستسلم
للجرح والياس والاحباط
والذل
نظرة شماتة من الكل
راكع للقدر
نظرات الناس تنزل مطر
ووقف تانى وقال
لا لازم اكمل الفشل محال
ولا حلم ولا حقيقة ولا خيال
دى قصتنا صعب اقول عشتها
بس الحياه انا خلاص صدقتها
اى كلمة عتاب خلاص مش وقتها
بس زى ما عايزانى احكيلك
لازم انتى كمان تحكيلى
احنا روح واحدة
حتى لو قتلانا الوحدة
معا انك بعيد صعب اجيلك او تجيلى
فى بنا دلوقت مليون باب
وانا احساسى بيكى عمرو ما خاب
مش عايز اسمع كلمة غلطانة
انتى ليكى طاقة انسانة
مفيش ملايكة احنا بشر
نغلط نتالم
جرح بوجع بيعلم وبنتعلم
ربنا يعلم انى بحبك
وعارف انك بتحبينى
قبل ما تمشى وتسيبينى
ممكن تنسينى
اى كلمة انتى فى يوم قولتهالى
لان اى حرف طلع منك لسة ع بالى
مش مهم اى شئ
مش مهم تخسرينى ولا اخسرك
تجرحينى ولا اجرحك
لو ناوية تمشى
علمينى ازاى اكرهك
:
:
:
Kary
خلاص أنا خدت لينا قرار
لا تحكيلي ولا احكيلك
ولا هاجي في يوم واشكيلك
وانا مش هضحك علي نفسي
ونتكلم باسم صحاب
لكن عايزاك تسامحني
ومش هاعيدها دي الغلطات
خلاص أنا خدت لينا قرار
لا تحكيلي ولا احكيلك
ومش هنكمل المشوار
:
:
:
Bahaa C Alex
قرارك ده جالى متاخر
خلاص مشيت معا التيار
يومين وحكون هوا متبخر
بدالك خدت انا القرار
وجهتى انتى عرفاها
فيوم مكنا احنا اتنين
السعودية لو فكراها
سايب الحبايب بدموع العين
لو مسحتي من عندى اسمك
لو مش شيفك ولا حسك
اكيد حفضل انا فاكرك
فخلى بالك من نفسك
ليست هناك تعليقات:
إرسال تعليق