بحر

Mohamed Magdy

هدوء و سكون و بيت ع الرمل مش مسكون 

جنون و شجون و موج عالي و دمع في العيون مكنون 

علي شطتك مشيت و سرحت في حالي و طفيت قناديلي 

و قناديلك في الليل تناديلي ... يا سارح في الليالي شوقك مدفيني

Kareenaa Kapoor

هدوء وسكون..وحيرة وآهة من التفكير

جنون وشجون...وخوف من فكرة التغيير

براحك لون سحرني زمان..وبكرة كمان..راح اسرح فيه

ولونك يا بحر مش غفلان يريح عين..في وسط نهاري أو ليلي

Mohamed Magdy

يا بحر براحك مليان فرحة ... بصدي ضحكة اطفال 

في احضان موجك بتتخفي 

يا بحر ليه معايا بتبقي وحيد 

وبغوص فيك بفكري لبعيد 

يا بحر لونك لون السما و الشمس نورها بعيد 

يا بحر بحري جوايا ملقتش لنفسي شط جديد

Kareenaa Kapoor

واية التجديد؟!!

ما بين شطك وبين بلكونتي وسريري

مع الافكار انا بسرح..في نفس مشاكلي وجروحي

فأنام غرقان ...في بحر ملامحه مغايرة لملامحك

واحلم بيك ..وبريحتك لما بتسأل "إية جارحك"

فاقوم محتاج اكون وياك بقلبي وعقلي وبروحي

فَ إية السر من فضلك..ياريت ..وبجد..تحكيلي

Mohamed Magdy

دا بسؤالك انا برتاح و تكوي جراح و تطوف الروح وانا مطروح علي رمالك ...

عاشق يا بحر و مش معشوق و انا قلبي دايب في هدايب عيون سهمها في صدري مرشوق وبكره لوحدي بغنيله و مشتاقله و مفيش من يومي غير ليله في الوحدة يغرقني

Kareenaa Kapoor

وبجوابك علي سؤالي...

أكون شاكر لأفضالك

و اشرب من ملوحتك عذب

وده قانون جذب

يعاكس كل اضرارك

لا انا غرقان

ولا عطشان

وتفاصيلك علي بالي

Mohamed Magdy

انا كل جزر و مد ...

و خيال ملوش حد ..

. انا ضباب فوق صفحة مياهك ممدود ..

. انا سراب ملوش حدود ..

. انا سارح فيك و مطفي قناديلي  و قناديلك يا بحر بتناديلي

Kareenaa Kapoor

انا انت في كل نهار

وليل وسكون وشمس وضيْ

انا انت ومالناش زيّ